Exposición: A Minerva Compostelá no seu pasado

A exposición "A Minerva Compostelá no seu pasado", é unha mostra que recupera parte da historia da institución a través da representación artística das figuras que marcaron a súa evolución, dos espazos que seguen, en certo modo, presentes na actualidade e das creacións artísticas que abeiraron ao longo dos tempos. A mostra dá continuidade á precedente "A Minerva Compostelá. As súas glorias", que se exhibíu no Colexio de Fonseca de outubro de 2021 a xaneiro do presente ano e ambas as dúas proxéctanse como complemento ao Museo Virtual da USC na visibilización do seu patrimonio artístico. Comisariada polo profesor emérito José Manuel García Iglesias, distribúese no Salón do Artesoado, a Capela e a Sancristía do Colexio e poderá ser visitada ata o 28 de xaneiro de 2023.