T 2. FALAMOS CON... María Ángeles Sandar Picado (Capítulo 6)

FALAMOS CON… é unha miniserie documental dedicada a persoas que pola súa implicación académica-docente, científica-investigadora, profesional, de xestión administrativa e servizos contribúen ao avance e modernización da Institución universitaria. Co testemuño das protagonistas constrúese un retrato poliédrico do personaxe, a súa traxectoria vital e humana. Unha viaxe entrañable ás súas raíces, á orixe familiar, á infancia e escolarización, aos anos de mocidade e contexto da súa Formación Superior, a súa dedicación á Universidade e ao recoñecemento social. Comeza a Segunda Temporada do programa co Capítulo 6, dedicado a María Ángeles Sandar Picado, Directora do Servizo de Vixilancia da Saúde da Universidade de Santiago de Compostela dende o ano 2013. Unha andaina que comezou no 2004, dende o Campus Terra de Lugo. Unha vida profesional dedicada á Medicina de Empresa e do Traballo, nunha contorna onde os pacientes son persoas próximas, compañeiros traballadores na mesma empresa. Polo seu traballo na universidade compostelá gustaríalle ser lembrada “como un médico que se esforzou moito en todo ou que fixo…. e, sobre todo, un médico honesto que quixo estar ou lado do seu pacientes”.